Sermon by Van Cin Thang

Kan Thlacamnak ah Dawntu Hna Text: Salm 66:18; Deut 1:41-45 "Ka sualnakkha rak thup ninglaw ka thlacamnak cu a rak ka ngaihpiak hnga lo"(Salm 66:18). Rian tha pakhatkhat kan tuan lioah, thil hnawm pakhatkhat nih maw, thil pakhatkhat hnahnawhnak a kan pe tu maw si loah akan dawnh tu an um ahcun a rannak in kan thianh ton hna. Kan thianh zawkzawk hna lo ahcun kan tinhmi a kan phan ter kho lo tu an si ko lai. Kanmah lihla hmanh a kan hrawhral tu an si kho. Pathian he kan ipehtlaihnak( thlacamnak) zong ah, a zei pawl khidah a ka dawntu bik cu an si ti hi kan hngalh a herh ngai mi a si ve. Kan ral kan ngalh fianglo ahcun caan khatkhat ahcun a kan hloh tu an icing kho. Kan thlacamnak ah dawntu a simi a tangah lei ahhin vun ihrawm tti dingin Bawi Krih min in kan dingin kan sawm hna. 1. Sual ingeihchih lonak/phuan lonak Mitam deuh nih kan daitlang bikmi le kan thlacamnak tha a derter tu a si lai tiah ka ruah. Salm catial tu pa King David nih cun "Ka sualnakkha rak thup ning law ka thlacamnak cu a rak ka ngaihpiak hnga lo" (Ps 66:18). Mirang Baibal NASB chungah cun " Ka sualnak kha ka lung chungah rak chiah peng ninglaw ka thlacamnak cu a rak ka ngaihpiak hnga lo". Baibal nih lungchung ah sualnak thupnak kong a chim tikah, a sawh duhmi cu sual ingaihchih lonak khi a chim duh mi cu a si ko. Kan lungchungah kan sual ti kan hngalh ko buin ingaihchih loin kan um pi peng ahcun Pathian he a kan hla ter cu an si zungzal ko lai. Cun kan thlacamnak tha a der zau ko lai. Sualnak kan tuah tikah Pathian he lengtti, Pathian lam in kan pial i, lam dang zulh kan itimh ton. Sualnak kan tuahnak nihkhan kan tuaktannak le kan khuaruahnak zong a hnawl ter fawn. Cu nihcun sual muinak lam ah a kan naihter chin lengmang. Sihmanhsehlaw, kan caah thanwgtha pakhat a ummi cu " kan sualnak kan ingaihchih tikah Pathian nih a kan ngaihthiam i, sual ngaihthiam mi kan si than. I Jonh 1:19 nih a timi cu "Sihmanhsehlaw Pathian sinah kan sualnak cu kan phuan hna ahcun, a dingmi le zumh awk tlakmi a si caah, a biakam kha let loin kan sualnak kha a kan ngaihthiam lai i kan palhnak vialte kha kan thianhpiak dih lai." Pathian nih kan sualnak a kan ngaihthiamnak cu a cheuchum lawng si loin a tlingmi ngaihthiamnak a si. Jeremiah 31:34b "An that lonak kha ka ngaihthiam hna lai i an sualnak kha ka hngal camcin ti lai lo" a ti. Pathian cu kan sualnak ngaithiam dingin ralring ready a si peng ko. Pathian sinah kan sualnak kan ingaihchih/phuan ahcun Pathian nih akan ngaithiam lai i, kan thlacamnak zongah thazangthar kan ngah than ve ko lai. 2. Zumhnak ngeih lonak Pakhat le pakhat cungah zumhnak kan ingeih lo cu kan ipehtlaihnak a fek lo ruangah a si ko. Kan ipehthlaih ning a ningcang mi a si lo ruangah a si. Heb11:6 nih zumhnak lo cun Pathian lung ton khawh a si lo a kan ti bantukin, kan thlacamnak zong zumhnak aa tel lo ahcun Pathian nih a kan theihpiak ve hlei lai lo. Zumhnak lo cun thlarau thawnnak le thlacam thawnnak zong a zor i, a tlau ve. Zeicatiah thlacamnak cu zumhnak in a ra mi a si, zumhnak nih a kan tuahter mi tuahser nak a si caah si. Minung hi kan zumhnak le kan iruahchanhnak nih a kan nuamter, lunglawmhnak a kan pek i thawnnak zong a kan pek ton. Cucaah thlacam nun kan ngei zungzal khawhnak ding caah cun a fekmi zumhnak kan ngei a hau ve. Hmailei ah a hmuh kho mi zumhnak, caan sau a ngumi zumhnak kan ngei a hau. Phundang in kan chim ahcun zumhnak cu theihhngalhnak le ibochanhnak nih a kan pek mi si or ibochanhnak in kan hmuh mi a si. Mark 11:24 "Cucaah cun, thlacam in nan halmi thil paoh kha, kan hmuh cang tiah zum u law nan hal mi paoh cu nan hmuh ko lai." Caan tampi cu Pathian nak in minung, phaisa le thil dangdang hna kan ibochanh deuh caan a tam. Hi Baibal cacang nih a chimduhmi cu "nan halmi poah" a ti tikah, kan pumsa nomhnak ding ca le thil tha lo a kan tuah tertu ding, Pathian a kan philhter tu ding thil hna kan hal ahcun a kan pek lai lo i, Pathian duhning in le kan zumhnak ningin kan halmi poah cungah khan Pathian nih kan caah a tha bik a ti ningin a phi a kan pek lai ti khi a si. Thiltha a chuahter tu ding lungput (the right motive) he kan hal awk a si. Cucaah chimduh mi cu, Pathian sin kan zumhnak a nun (active) zungzal ahcun kan thlacamnak zong a nun zungzal ve ko lai. Cun fekset lo in aa hninh lengmang mi zumhnak a si ahcun cu cu kan thlacamnak akan dawntu pakhat a si ve ti kha kan philh lo awk a si. U le nau hna, nifatin kan nunnak ah Pathian nih a fekmi zumhnak he pehtlaih zungzal a kan duh. 3. Nawl ngaih lonak Ka rak ngakchia deuh lio tangriat ka rak kai lio, thaal sianginn khar ah, ka hawi le pawl he KaChin ram KhanTii (ruby land) ah kal kan rak itimh. Theihhngalhnak ah tiah, kal dingin cun ka pa ka rak chim cu, ka pu nih a rak duh lo,"na hawi le pawl cu nangmah nak in upa deuh lawngte an si i, nangcu na ngakchia tuk rih, na tuan kho rih lai lo kum vui lei ah na kal ve te lai" a rak ka ti. Kei nih ka pa ka kal ve ko lai ka tuan kho tuk ko lai ka rak ti. Ka pa nih cun kal duh hlah kan ti, na kal na kal ve ahcun…." a rak ka ti. Nain ka hawi le pawl hmanh an kal ko mi cu ka ti i, thli tein ka rak kal ve. Midang Kalaywa in Kantti tiang zarhkhat lawng an rauhmi kha kan nih cu thlacheu kan renglo kan rau. Cun rian kan vun tuan cu thaal lio sikaw, ni a linh ning cu ti awk tha lo, ni linhlak ah chun nitlak lungcawh si i, ka rak celh ruam lo. Thatlolak tein ka pa bia ka rak ngaih duh lomi kha ka rak ingaihchih ve. Nain a zeitiawk arak tha ti lo. Pathian bia nih a kan chawnpiak micu Pathian nawl/bia ngaih lonak cu kan thlacamnak dawntu a si ti hi a si. Deut 1:41-46 chungah, Pathian Israel pawl kha va kal i promise land kha va tei hna dingin nawl a pek/chim hna. Cu promise land va zohta duak dingah mingiattu (spy) pa 12 an thlah hna. Cun an rak kir tikah, 10 hna nihcun khika ramah minung hna cu an ngan tuk hna cun an vanpang zong kulhdih mi a si i, Pathian nih zeitin a chim zongah kan tei kho hna lai lo an ti. Joshua le Caleb an rak kir i, report an pekmi cu an ram cu a tha bak ko, Pathian nih tei hna u a kan ti i, cucaah kan tei khawh hna lai" an ti. Asinain Israel pawl cu mingiattu hna 10 chimhmi kha an zumh i pa 2 chimhmi kha an al hna. Pathian nih kan bomh hna lai, nanmah caah keimah nih kan doh piak hna lai a ti ko hna nain Pathian nawl an ngai duh lo caah Joshua le Caleb ti dahlo cun a hohmanh nih Promise land an hmuh kho lo. Cu bantuk in Pathian nih a kan chimmi kan tuah duhlo, a nawl kan ngai lo ahcun kan thlacamnak zong let kan si ve lai lo. Nawlngaihnak lawng nih thlacam thawnnak thazang a kan pek than khawh ti hi a si. Nawl ngaihnak hna cu; Pathian thangthat, a dinmi lam zulh, Pathian he a dikmi pehtlaihnak ngei peng etc,, hna an si. Donghnak ah, Pathian fa kan sinak cu Pathian he nifatin kan nunnakah kan ipehtlaihnak/ ning nih hin a fianter ko. Taksak leiin A ngandam zungzal mi kan sinak ding caah cun kan cianmahzi (health) tha tein kan izohkhan thiam a herh i, kan pum harnak a kan pe tu zawtfahnak hna zong hngalh i kan thianh dih zong a herh ve. A ngandammi zumtu kan si khawnak ding caah Pathian he kan ipehtlaihnak (Thlacamnak) ah dawntu a si mi poahpoah kan hrial hna a herh. Pathian nih Amah he a fekmi le a hmunmi pehtlaihnak kan ngei khawhnak lai thlarau thawnnak kan pek cio hram seh. Nan Unau, Van Cin Thang Philippines --- Note: Mah sermon hi 3 May 2009 ah Sermon ttialtu pumpak nih Laiforum ah a thlahmi a si. ------------------------------