Zarhkhat A Nguh Lo Mi Thangtthatnak (Mtt. 21:9 , 26:40 , 26:49) Bawipa thawhzarh Sermon Hi bantuk in hmunkip um mi kan Zophei mi sinah thawngttha phuan kho ding in caan ttha a ka pe tu ka Pathian cu a min zungzal thangtthat in um ko seh. Kan tlak tlin lo bu in hi bantuk caan a ka hoih tu hna Zophei kan pa le cung zong ah kaa lawmtuk ti chim hmasa ka duh. Pathian nih sunpar nak co zungzal ko seh. Hi bantuk kan Bawipa a thih caam tuak he i tawn in caan nan ka pek ka ruah ah hin ka thin lung phun dang ngai in a um. Phungchim ding tampi um ko hmanhsehlaw chim kaa tim lo i a thih nak kong he pehtlai in " Zarhkhat hmanh a nguh lo mi thangthat nak, ruangah a chuak mi thih nak ," ti nih hin ka lung a ka suk tuk i hi bia, bia tlang hmang in i ruah tti hna u sih ti ka duh. Kan rel mi Bible ah khan kan hnu zarh Palm Sunday ti mi ah kan Bawipa Jesuh sunglawi ngai in Jerusalem an luh ter i kan Siangpahrang a si cang lai an ti ruangah thangtthatnak an pek i an si ning dih lak an siannak kan hmuh. An thangtthat hnu zarhkhat a rauh hlan ah Gesmanidum nili zan Pa sin thla a cam kar ah Peter le a hoi le nih an rak i hngilh tak dih i kan Bawipa nih Peter suimilam pakhat hmanh nan ka ngak kho lo maw?, a vun ti i cu luk lak ah a dawtbik mi hmunkhat ah rawl kho a purh tti mi Judas nih Saya ti in a rak hnamh i cu a hnamh bak ah a hnu in thircikcin nih a zulh cawlh. Hi thil hna ka tuak i ka lung a ka suk tuk i ka miphun hoi a si mi Zophei mi dih lak zong nih bia tak deuh in ruat u sih ti ka duh. Isaiah -43:21 ah cun Minung hi a mah thangtthat tu ah a mah Pathian nih a caah aa ser mi a si zia kan hmuh. Cun Salm-146:2 ah cun kan nunnak a um chung poah cu ka thangtthat lai a ti fawn. A ho kan si ah kan duh bik mi le kan i lawm bik tawn nak cu thangtthat kan co le cawnghlawmh kan co can khi a si tawn.Pathian nih a duh mi cu keimah zong thangtthatnak ka pe hna sehlaw Vawlei minung an mah le an mah zong i thangtthat hna sehlaw i lawmh ter cio hna seh ti cu a kan duh mi a si. Nihin Vailam i an khenh mi kan Bawipa kong ruah ah hin a ho rual nih hme an that i an hrem ti tikah zahan zarhpi ni i Jerusalem a luh lio i a dong tu ,an thil ngeih mi vialte a caah an phah piak i a thangtthat tu hna nih an that ti hi vawlei cung pi theih a si. Hoi dawt an thangthat lio ah khan cun zungzal an Siangpahrang ca ding ah le Uktu ding ah a si na-in an ruah ning a si lo cang ka Vailam ah that ko u ti in an ttang tthan. U nau ni hin kan Pathian biak ning le thangthat ning hna hi ruat tthan ve hmanh u sih. Biakinn chung i suimilam caan chung te ah cun thiang hirhiar in thinlung tak in a thangtthat mi kan lo. Na-in Biakinn leng kan chuah cun kanmah kel kan i chuah tthan tawn. Biakinn chung kan um ah cun " zeizong te kan pek" kan ti i kan din, kan ei, kan hmawm, kan khai,kan zuk zong a mah ah kan chanh i kan kut ah a um lo. Pumh a dih cang ka a cheu innkaa hmanh chuah hlan i Jesuh kut chung cun kan chuh tthan cawlh i kanmah nih kan i ken tthan tawn. Biakinn chungah cun bia ttha le holhkaa ttha , mithmai ttha long a leng na-in a leng kan chuah cun a lo tthan dih. Rom-1:21 ah cun," Pathian cu, hngalh cu an hngalh ko, sihhmanhsehlaw pek awk a tlak mi Upat nak kha an pe duh lo, a lawmh zong an i lawmh duh lo a ti. "Nang tah aa tlak mi thangtthatnak le Upat nak cu na pe ve maw?". Mi tampi ram leng chuah lai hmang i Pathian thangtthat le lawmh kan duh ning kan Pastor le cung i kan i lawmh ning le nu le pa, Khrihfabu cung i kan i lawmh ning hna hi ka ruat. Micheu cu kaa lawm tuk Pastor kan philh lai lo an kan ti i kawlram in an chuah hnu cun an kan thei ti lo, Lakphakti man hna cu chim lo thawngpang hal hmanh kan tong ti lo. Cu bantuk tthiam cun Malay in ram thumnak lei a chuak mi hna zong an kal nak ram an phanh hnu cun hnu lei in thlacam piak tu a philh kan tam ko cang. " Nang tah na philh ve sual maw?". Cun nu le va kong ah Mi tampi cu thih hlan lo long hmanh si lo in thih hnu hmanh ah aa tthen kho lo ding tluk in an i duh an i daw, na-in a rauh hlan ah an i then, a cheu an fa le khoi zei lei kan panh lai ti theih lo in a vaih ter mi kan tam cang. Judas nih Jesuh a hnamh mi cu minutes hmanh a daih lo. Cu bang tu lio mi tampi a lang in nu pi hna cah can kan phan i a lang in muih nak in phaisa tam ruang hna ah maw …Ee..ti in ram leng chuah in i tawn taktak ah cun a si kho than lai lo ti in aa tthen mi an tam tuk . Phaisa hnamh cu a nuam na-in minung ngai i hnamh chih ko cu kan i harh tawn. Nu le Va kar i kan i duhnak le kan i dawtnak hna hi chan tling a nguh mi a si awk a si. Ramdang a pet mi hna nih ruah awk bia in ka duh mi cu kan i thangtthat nak le kan i lawmhnak hna hi zei tiang dah a nguh awk a si ti hi kan fian deuh awk ah ka duh. Ram dang phanh tik ah a phan hmasa mi hna nih rak dawn cu a si i a hnu a hung phan mi hna nih kan i lawm tuk e tiah toidor te in bia chim le thangtthat nak pek an si. Tlawm pal an vun um i an mah te in um kal an thiam nawn cun hmasa i an ca i a rak tuar tu hna le dawtu hna kha zei ah an rel ti hna lo. Kan phanhnak kip ah hin thangthat le lawmh nun a tam ah cun kan miphun hi kan i daw chin lai i kan i hlum chin lai i, kan tthang cho lai. Thangtthat le cawnghlawmh nun kan dai thlanh ah cun kan phun pi in kan zawr chuk chin ko lai. Ngak chia te hmanh a lawmh zia kan thiam hna ah cun nawl an ngai khun i kan herh mi hlawh a tling tawn. Na nu pi zong a tuah mi thil hme te cung ah a lawmh zia thiam hnik an dawt deuh hrim hrim lai. Na va zong kha nangmah kan vat cu ka van tha tuk, nangmah hlei in pa vialte lak ah ka lung a cam mi an um lo ti law na ruah lo mi thil ngan zong an cawk piak ko lai i an dawt khun ko lai. Isaiah-1:2-3 ah cun ka cawm cia ka ken cia ka fa le lila nih an ka doh i an ka ral a ti.. Na ca i Bawipa tthat nak ruat tthan law a mah cu thangtthat law lawmh tuah.Bible ah cun ser mi thil dih lak nih thangtthat hna seh ti kan hmuh i cu lak ah minung cu a mah Pathian muikeng le a thangtthat tu ding ah a kan ser bang , fak chin chin in thangtthat nak le lawmhnak pe hna u sih. Zarhkhat lawng a nguh mi thangthatnak si lo in a zungzal in thangtthat le lawmh a dai lo mi kan si zia thei cang hna usih. Kan miphun chung U nau pakhat khat na lawmh le Pathian rian tuan tu kan lawmh hna hi A mah lawmh le thangtthat a si zia zong thei usihlaw a tu thawk in Jesuh cu zarhkaht long a nguh mi thangtthatnak si lo in a zungzal a nguh mi thangtthatnak le lawmhnak pe hna usih ti forh fial bu in ka phungchim ka dongh ter. Kan Pathian nih thluachuahnak pe ko seh….Amen… ------------------------------ "The Greatest Hope of Society is Individual Character" |
Subscribe to:
Post Comments (Atom)
0 comments:
Post a Comment